د حسن التجاني يكتب الي فاشر السلطان تقودني روحي ثم احساسي …(2)..!!

وهج الكلم

* مواصلة لوهج الامس في فاشر السلطان المدينة التي احبها بل اعشقها ..وفي ارض المطار اطلقت اول تعليماتي لقوتي في السجل المدني…انصراف يا بوليس نتقابل في المكتب والساعة كانت نهاية دوام لكن اصريت ان ازور موقع عملي الجديد…تم تسليمي سواقي الخاص وسيارة مدير السجل المخصصة له وكانت موديل متأخر لكنها بحالة جيدة وانطلقنا لداخل المدينة وفي الطريق للمكتب طرق مسفلتة ونظافة غير عادية وسيارات جديدة علي الطريق وبشر معافيين صحة ومظهرا وشكلا ….يا الله كم كانت سعادتي وانا ازداد اطمئنانا
والعربية تقطع الطريق الي المكتب
بانسياب عجيب ..ولم اتحدث مع السائق نظام الضبط والربط واذكر السائق اسمه محمد ربيع فقط هذا الذي كان حديثي معه….اسمك منو يا بوليس؟….قال لي محمد ربيع
كان زول وديع تربية والدته ووالدته كانت عاملة في مكان ما.(لاحقا عرفت ذلك) ..المهم كان مدللا مواكب الموضات الشبابية هذا الذي لاحظته عليه …فقلت في نفسي يحتاج ليه (سوط) علي قول الممثل الكوميديان جبريل (جبركة) راجل
(خابر عزو)..

* العسكرية بطبعها ناشفة واخوكم كان قابض عسكرية شديد ….وصلنا المكتب كل عسكري اخد وضعه فور وصولي.. اصلو المقدم محمد موسي نائبي كان وصل قدامنا
وجهز طابور استقبال اخر …اصلي كنت جاهز تب كاكي مبرقع وعصاية تسر الناظرين ونظارة سوداء (ماركة) ….صفا انتباه محمد موسي يرفع التمام اصلا التمام كان مرفوع ليه سلفا …عادة التمام ببدأ من اقل رتبة في ضباط الصف ويصل لاعلي رتبة في الضباط
تمام سعادتك قوة السجل المدني ولاية شمال دارفور الفاشر العدد كذا الموجود كذا …طبعا النقطة دي عاوز اوريكم ان كل شئ في الفاشر مرتب وليست هي بذلك السوء الذي نسمع انما بلد في غاية الروعة والجمال…..شد انتباهي في الطابور
كم محترم من العنصر النسائي يرتدون الكاكي الشرطي وهن اكثر انضباطا….اصلا امراة دارفور امرأة منتجة وكادحة وتعمل لجانب الرجل في اي مكان وزمان ….لله درها.

* استلمت التمام ….وبصوت جهور والسرور يتملكني والعزة تسيطر علي نبرات صوتي …طابووووور صفا اينتباه….اييينصراف….هللوا وكبروا وانصرفوا في فرح عجيب حقيقي ازددت طولا يومها اكثر من (3) سنتمتر.

* تجولت سريعا بالمكتب وخارج المبني ووضعت خطتي كاملة مجرد هذه الزيارة الخاطفة…اصلو اخوكم (صعلوق) (ادارة وسجل مدني).. عرفت ماذا يجب ان يكون وماذا افعل ولم تمر علي وصولي ساعتين او ثلاث….

* المقدم محمد موسي يا سعادتك بيت مدير السجل المخصص لسعادتك في حي الجيل …وعندك جناح في استراحة الضباط بالكرانك …هناك الضباط ساكنين
….قلت بدءا بالتأكيد مكان الاستراحةافضل…صادف وصولي العقيد هشام بشير من الشرطة العامة كان في اجازة ودفعتي محمد ادم ابكر اقترح علي فترتي الاولي ان اكون جارا له…بجوار العقيد دكتور وليد عبد الحي والعقيد عمر عبد الماجد مدير المباحث …اصلا العقيد وليد كان زول دكتور ماسك ادارة المنظمات
حتي عربيته ما كان بتشبه عرباتنا
واصلا نحن ما محتاجين لي عربات هناك كل شئ قريب بالارجل لكن الكاكي كان بلزمك تركب سيارة كنوع من (البرستيج)..

* مشيت الاستراحة في حي الكرانك …والكرانك حي خاص بكبار الموظفين في حكومة الولاية …مبني بيوت محترمة بناء حديث …وخدماته ممتازة من ماء وكهرباء ….والاستراحة كانت علي مقربة من الكرانك.

* الاستراحة مجهزة بكل مطلوبات الحياة ليست هناك مشكلة موية ضعيفة ولا كهرباء قاطعة …كل شئ مرتب.. معقول يا اخوانا طيب الفاشر دي عديييل اخير من الخرطوم …العقيد محمد ادم ربنا يجزاه خيرا كثيرا…. كان مسئول (الميس).. معه طباخين يجهزون كل شئ تحت اشرافه والطباخين عسكر كلهم والحراسة عسكر …لكن الامن والامان يحيطان بكل المدينة
ليس هناك خوف….ولا رعب يا سلاااااام يا فاشر للاسف اهلك واولادك ما عارفين قيمتك ولا مضمونك ولا محتواك …تبا لهم
جرفتهم دول الغرب وغشتهم ثقافتها وحضارتها الجوفاء وزرعت الفتنة بينهم واخوتهم في شمال السودان وشرقه ووسطه وجنوبه الجديد .

* لسه انا في اول يوم لي ما طلعت عصرا او بعد المساء …دعانا محمد ادم للغداء بالصالة الرئاسية وهي داخل الاستراحة خلف الغرف …وتعال شوف المائدة كل ما طاب ولذ من انواع الطعام والتحلية الميس هو من اشتراك الضباط وليس من الحكومة …وبعض اصحاب الايادي البيضاء من اعيان البلد …ياخ دارفور كلها (حاتم الطائي)…حاتمييين حفظهم الله …اليوم الاول في فاشر السلطان والساعات الاولي لوصولي هناك نزلت مطرة بقوة والدفء والجو الرهيب كانا خير استقبال قلت الواطة جاطت والطين سيعمر صفونا…ولكن خاب ظني خرجت امام بوابة الاستراحة لم ار نقطة ما يا للدهشة يا للعجب……يا الله…لسه لسه انتو ما قريتوا ولا شئ اصبروا الجميل والمدهش الجاي…اللواء عمر الامين كان مدير شرطة ولاية الفاشر …زول راق ومهذب و(فهمان)… مهندم و هاااااادئ هو لا يميل لاذية اي شخص…لكن المدير حوله دائما الصالح والطالح….وهذا يتوقف علي (كاريزميته)….وعن اللواء عمر نبدأ اليوم الثاني في فاشر السلطان وسنقول لكم من هو ود الامين ؟

سطر فوق العادة :
والله المهمشين ناس الشمالية …المظلومين ناس الشرق
و المسحوقين ناس الجزيرة …يا وجعي عليكي يا فاشر السلطان انت عشقي وكل حبي….نواصل وللتواصل واتس (00249123906060)
(ان قدر لنا نعود)